Новы штам каранавіруса “стэлс-амікрон” можа стаць пераважным. Пра гэта заявілі ў Міністэрстве аховы здароўя Расеі. У Кітаі ж кажуць аб рэкорднай успышцы захворвання кавідам. Хто ў зоне рызыкі?

Тыя, хто захварэў, зноў губляюць нюх, кажуць вірусолагі. У Германіі і Кітаі фіксуюцца максімумы захворвання новым штамам каранавіруса “стэлс-амікрон”. Адна з прычын, хутчэй за ўсё, – мігранты, у якіх няма імунітэту да кавіду.

У Расіі доля новага штаму сярод хворых на каранавірус COVID-19 – пакуль 20 працэнтаў.

“Маючы больш высокую кантагіёзнасць, падварыянт “амікрона” BA.2 мае ўсе шанцы хутка стаць пераважным штамам. Рэкордныя лічбы захворвання ў апошнія дні фіксуюцца ў Германіі.  Улады Кітая паведамілі аб рэкорднай для Кітая ўспышцы захворвання ў дзясятках гарадоў краіны. У большасці выпадкаў выяўляецца падварыянт “амікрона” BA.2″, – каментуе сітуацыю міністр аховы здароўя РФ Міхаіл Мурашка.

Успышка ў 28 правінцыях Кітая. Хворых выявілі пасля буйнамаштабнага тэставання. Улады ўжо заявілі, што маюць намер узмацніць антыкавідны кантроль у Паднябеснай. Адна з мер – тэсты на каранавірус COVID-19 прыйдзецца здаваць пяць дзён запар. Але не ўсім.

“Да людзей, якія знаходзяцца на каранціне, адносяцца тыя, хто знаходзіцца на каранціне дома, тыя, хто прыбыў з-за мяжы, а таксама тыя, з кім яны кантактавалі. Усе яны абавязаны заставацца дома. Пасля гэтага цягам пяці дзён запар яны будуць здаваць тэст на каранавірус. Каранцін будзе зняты пасля таго, як тэсты пакажуць адмоўны вынік”, – тлумачыць намеснік дырэктара Нацыянальнага цэнтра клінічных лабараторый Нацыянальнай камісіі аховы здароўя Лі Цзіньмін.

Яшчэ ў выпадку заражэння “стэлс-амікроном” сімптомы часцяком падобныя на кішачнае атручэнне, лічаць інфекцыяністы. Справа ў тым што гэты вірус значна больш актыўна, чым усе папярэднія штамы, размнажаецца ў страўніку.

“Пры “стэлс-амікроне” вярнуліся сімптомы страты нюху, больш выяўленыя болі ў горле, асіпласць голасу і галаўны боль са страўнікава-кішачнымі расстройствамі. Катастрофы і панікі па “стэлс-амікроне” я не бачу. Прынамсі, для нашай краіны. Таму што з нашым стаўленнем да эпідбяспекі мы ўжо перахварэлі на каранавірус некалькі хваляў і маем пэўны імунітэт”, – адзначае ўрач-інфекцыяніст Яўген Цімакоў.

“Амікрон” стаў больш актыўным, кажуць у Расспажыўнаглядзе. Гэта пацвярджаюць і вынікі лабараторных проб. Калі яшчэ ў пачатку лютага вірус сустракаўся ў 3 працэнтах узораў біяматэрыялу, то цяпер ён – у чвэрці проб на COVID-19.

“Такія сезонныя ўласцівасці інфекцыі ў далейшым будуць выяўляцца яшчэ больш выразна. Мы будзем чакаць нейкія чарговыя ўсплёскі-ўздымы не толькі сезонных ВРВІ, але і каранавіруса ў асенне-зімовы перыяд. Найбольш часта “стэлс-амікрон” паражае невакцынаваных”, – кажа намеснік дырэктара па клініка-аналітычнай працы ЦНДІ эпідэміялогіі Расспажыўнагляду Наталля Пшанічная.

Вакцынацыя двума кампанентамі, рэвакцынацыя, а потым праз паўгода можна зноў калоць бустар – класічная схема Міністэрства аховы здароўя працягвае дзейнічаць. Гэта і навукоўцы пацвярджаюць.

“Антыцелы ў выніку вакцынацыі прэпаратам “Спутник V” ад гэтага штаму таксама абараняюць. І той кактэйль антыцелаў, да клінічных выпрабаванняў якога мы зараз прыступілі, у адрозненне ад усіх іншых кактэйляў антыцелаў таксама абараняе ад новага віду штаму”, – падкрэслівае дырэктар Цэнтра імя М. Ф. Гамалеі Аляксандр Гінцбург.“Кактэйль антыцелаў” – так у Навуковым цэнтры імя Гамалеі называюць свой новы тэрапеўтычны прэпарат. Ён для тых, хто захварэў, шпіталізаваны, і стан пагаршаецца. У складзе ін’екцыі – ужо гатовыя антыцелы. Пацыенту іх будуць уводзіць унутрывенна. Але гэта ў выпадку поспеху клінічных даследаванняў, якія вось-вось пачнуцца. Паралельна завяршаюцца выпрабаванні назальнай вакцыны. У НДЦЭМ імя Гамалеі кажуць: калі Міністэрства аховы здароўя прыме рашэнне аб рэгістрацыі прэпарата, прыкладна праз тры тыдні можа з’явіцца альтэрнатыва традыцыйнай прышчэпцы. Гэта назальны спрэй, для якога, мяркуючы па ідэнтычным “Спутнику V” складзе, “стэлс-амікрон” – не пагроза.